Abdirizak Ahmed

Luuliyo, Columbus, OH

Wasiirka Sinaanta ee dalka Spain Bibiana Aido ayaa eedayn kulul usoo jeedisay raga muslimiinta ayadoo ku dhaleeceysay in raga muslimiinta ay iyagu xirtaan dharka reer galbeedka halka dumarkoodana ay u xiraan dhar dhaadheer oo ay jirkooda ku qariyaan waa siday hadalka u dhigtaye.

Wasiirka ayaa hadalkan ka sheegtay kulan looga arinsanayay arimaha haweenka ayna soo qabanqaabiyeen golaha barlamaanka dalka Spain. Haweenaydaan wasiirka ah ayaa aad ugu dheeraatay in dawladeedu ixtiraamayso  dhamaan dhaqamada iyo caadooyinka kala duwan balse ay ka soo horjeedo waxa ay ku magacawday sinaan la’aanta xuquuqda raga iyo dumarka muslimiinta.

Waxayna ku baaqday in la qaado talaabooyinka ku haboon ee lagu joojin karo waxyaabaha dhibaatada ku ah xuquuqda Insaanka.

Hadalada ka soo yeeray wasiirka ayaa waxa aad uga xumaaday muslimiinta ku dhaqan dalka Spain waxayna sheegeen in ay ugu baaqayaan wasiirka in ay raaligalin ka bixiso hadalkan aysana ka hadlin wax aysan wax ka aqoon, maadaama xijaabku uu yahay wax Alla uu ku faral yeelay haweenka muslimka .

Madaxa Raabidada Islaamka ee dalka Spain ninka lagu magacaabo Mansuur Scodder  ayaa sheegay in Qur’aanka uu amray haweenka iyo raguba in ay is asturaan.

Mansuur oo hadalkisa sii wata ayaa wuxuu yiri dalalka reer galbeedka waxaa aad ugu soo badanaya naceybka loo qabo gabdhaha muslimka guud ahaan, gaar ahaan kuwa ka soo jeeda wadamada carabta.